လမင်းလေးရဲ့ အဝေးလူ

ညက ပိုအေးစက်လာလည်း
သူကတော့ မပြောင်းလဲဘဲ... ဟိုးမိုးမြင့်ထက်မှာ တောက်ပဆဲ။

နာရီတွေပဲ ငိုနေသလား
တိုးလို့ သွားတဲ့ စက္ကန့်တိုင်းဟာ ငါ့တွက်ခုတော့ လွမ်းမျက်ရည်များ။

ယောင်ပြီးတ တတ်တဲ့ နာမည်လေးတစ်ခု
နှုတ်ဖျားလှုပ်ရုံလေးပေမယ့် ရင်ထဲမှာတော့ ဟုန်းဟုန်းမြည်တယ်
နှင်းတောင်ဝေပြီ... ပြန်လာချိန်တန်ပြီထင်ရဲ့လေ။

သူဖျစ်ညှစ်ကစားဖူးတဲ့ ပါးပြင်လေးမှာ
အေးစက်တဲ့လေကို လှောင်ပြောင်ဖို့ ပူနွေးနွေးမျက်ရည်စီးပြီ
သူလေ... လမင်းလေးနဲ့ နီးချင်မိတယ်။

ဟိုးမနက်ခင်းတွေ... နှင်းနဲ့မြူတို့ဝေလို့
တစ်ခါက တူတူရှိဖူးတဲ့ မနက်ခင်းများကို လွမ်းမော၊
လမင်းလေးနဲ့ ကင်းမရသူမို့
အဝေးကပဲ တမ်းတရတယ်...
ဒီလူကို စာနာနိုင်ဖို့ ဒီကဗျာလေး ပို့လွှတ်လိုက်မယ်။
ချစ်သူ သိစေ နားလည်ပါစေသား။

သီဟလုလင်

(၁၈ ဒီဇင်ဘာလ ၂၀၁၂)

ခရစ်စမတ် ဆိုသည်မှာ...

ခရစ်ယာန်တို့၏ နှစ်စဉ်ကျင်းပသည့် ပွဲတော်တစ်ရပ်ဖြစ်သည်။ မိမိတို့ကို အပြစ်မှ ရွေးနှုတ်တော်မူသော ကယ်တင်ပိုင်ရှင် ခရစ်တော်ယေရှု၏ ဖွားမြင်ခြင်းကို အောက်မေ့သတိရလျက် ကျင်းပခြင်း ဖြစ်ပါသည်။ ကျင်းပရာတွင် မွေးနေ့တော်နှင့်ဆိုင်သော ဓမ္မတေးသီချင်းများ သီဆိုခြင်း၊ ဝတ်ပြုကိုးကွယ်ခြင်း၊ နိပတ်တော် ပြသခြင်း၊ ကျွေးမွေးဧည့်ခံဝတ်ပြုခြင်း၊ မေတ္တာနှင့် လက်ဆောင်ပေးခြင်းများ ပြုကြသည်။ ရပ်နီး ရပ်ဝေး မိတ်တွေသင်္ဂဟတို့ထံ ခရစ်စမတ်ကဒ်များ ပို့လျက် ဆုမွန်ကောင်းတောင်းကာ သတိရနှုတ်ဆက်ကြသည်။ မိမိတို့ အိမ်များတွင်လည်း အလှတန်ဆာများဆင်လျက် မီးများထွန်းညှိကာ ပျော်ရွှင်ဖွယ်ရာ ဖြစ်အောင် ပြင်ဆင်ကြသည်။

ခရစ်စမတ်အခါသမယသည် ခရစ်ယာန်တို့၏ မေတ္တာပြသည့် ထူးမြတ်သော အခါသမယဖြစ်သည်။ မိမိတို့ ကိုးကွယ်ယုံကြည်သော ထာဝရဘုရားသခင်၏ ကြီးမားသောမေတ္တာတော်အတွက် ကျေးဇူးတင်လျက်၊ အချင်းချင်း တစ်ယောက်ကို တစ်ယောက် မေတ္တာပြသော အချိန်အခါဖြစ်ပါသည်။