ကျွန်မတို့သည် ဧဝ များသာ

လူတွေက ဒီဘက်ခေတ်မှာ တန်းတူညီမျှရေးလို့ အော်ဟစ်နေကြပေမယ့် အမျိုးသမီးများဟာ တကယ်ရော တန်းတူအခွင့်အရေး အပြည့်အဝ ရရှိကြပါရဲ့လား လို့ ကျွန်မ စဉ်းစားမိတယ်။ ကျွန်မတို့ အမျိုးသမီးတွေဟာ မီးဖိုချောင်ထဲမှာပဲ ချက်ပြုတ်နေတဲ့ စားဖိုမှူးတွေ မဟုတ်တော့ဘူး၊ အိမ်သန့်ဖို့အတွက် တံမြက်စည်းလှည်း၊ ဖုန်သုတ်နေရတဲ့ သန့်ရှင်းရေးတွေ မဟုတ်တော့ဘူး။ အမျိုးသမီးတွေကို လုပ်ငန်းခွင်တွေမှာပဲ နေရာတစ်ခုပေးလို့ လုပ်ဆောင်နိုင်စွမ်းတွေ ပေးလိုက်ပြီဆိုတာကရော အမျိုးသားတွေက တကယ်ကို ကျေနပ်နားလည်မှုနဲ့ ပေးတယ်ထင်လား။ ကျွန်မတော့ မထင်။ အနည်းဆုံးတော့ ကျွန်မတို့ဟာ အိမ်ပြန်ရောက်ရင်လည်း အိမ်မှုကိစ္စတွေ မလုပ်မဖြစ် လုပ်ဆောင်ကြရတာပါပဲ။ တကယ်တော့ ဒါတွေဟာ ဟိုးအရင် ကမ္ဘာဦးကတည်းက ဖြစ်ခဲ့တဲ့ ကိစ္စတွေပါပဲ။

ကျွန်မတို့ ခုချိန်ထိ ခရစ်ယာန်ကျမ်းစာထဲမှာ ဖတ်ရှုနေရဆဲ အပြစ်တရားကို စတင်လုပ်ဆောင်သူ အခြေခံအစဟာ မိန်းမသား ကျွန်မတို့ ဖြစ်နေတယ်ဆိုတာပဲ။ ဒါဟာ ကျမ်းရေးသားသူတွေရဲ့ ကျွန်မတို့ မိန်းမသားတွေအပေါ် လက်ညှိုးထိုးမှု သက်သက်အဖြစ် ကျွန်မ စဉ်းစားမိတယ်။ ဘုရားသခင်ရဲ့ အမြင်မှာ ယောက်ျား ရယ်၊ မိန်းမ ရယ် ဆိုပြီး ဘယ်သူမြတ်တယ်ဆိုတာ ခွဲခြားမှာ မဟုတ်ဘူးလို့ ကျွန်မထင်တယ်။ ဒါပေမယ့် ကျွန်မတို့ဟာ ကမ္ဘာဦးကတည်းကနေ အစဉ်အဆက် ခုထိတိုင် တူညီမျှတမှုကို မရနိုင်ခဲ့ပါဘူး။

အမျိုးသားတွေ ကြီးစိုးတဲ့ အခန်းကဏ္ဍတိုင်းမှာ ကျွန်မတို့ဟာ မှေးမှိန်ပျောက်ရှ သွားရသလို၊ သမ္မာကျမ်းစာလိုမျိုးမှာတောင် ကျွန်မတို့ဟာ အပြစ်တစ်ခုကို စတင်ဆောင်ယူလာသူတွေအဖြစ် ပုံဖော်ခံလိုက်ရတယ်။ ဒါဟာလည်း အမျိုးသားတွေ ဦးဆောင်ရေးသားတဲ့ ကျမ်းဖြစ်တာမို့လို့ မိန်းမထက် ယောက်ျားမြတ်တယ်ဆိုတဲ့ အဆိုကို အတည်ပြု လုပ်ဆောင်ရင်း သူတို့ခေတ်အခါအရဲ့ ဒီအတွေးအခေါ်ကို အတ္တကြီးကြီး ကိုင်စွဲ ရေးသားခဲ့ကြတယ်လို့ ကျွန်မ ယူဆမိတယ်။

အမျိုးသမီးကို အမျိုးသားရဲ့ နံရိုးကနေ ဖန်ဆင်းတယ်လို့ ဆိုပြီး ပိုနိမ့်ကျကြောင်း ကျွန်မတို့ကို ပုံဖော်ကြပေမယ့် အပြန်အလှန်သဘောအားဖြင့် အမျိုးသားတွေကရော အမျိုးသမီးတွေရဲ့ ဘယ်နေရာကနေ မွေးဖွားလာသလဲ ဆိုတဲ့ မေးခွန်းကို ကျွန်မမေးတော့ သူတို့တွေ ဘယ်သူမှ မဖြေနိုင်ကြဘူးလေ။ ဒါကိုကြည့်ရင် ဘုရားသခင်က သိပ်ကို မျှတတယ်လို့ ကျွန်မကတော့ ကောက်ချက်ချမိတယ်။

ဟုတ်ပါတယ်။ လူသားအားလုံးရဲ့ အပြစ်တရားအစက ဧဝ ကပါ။ ဒါပေမဲ့ တကယ်လို့သာ ဒီနေရာမှာ ဧဝ မဖြစ်ခဲ့ရင်ရော။ နှစ်ယောက်ပဲ ရှိတဲ့ ကမ္ဘာမို့ သေချာတယ် အာဒံပဲ ဖြစ်မှာပဲ။ ဒီလိုသာ ဖြစ်ခဲ့ရင် ဘာပြောမလဲ ကျွန်မ သိပ်သိချင်မိတယ်။ ရှင်? အာဒံက မြွေကျွေးတဲ့ ကောင်း၊ မကောင်း သိကျွမ်းရာအသီးကို ဧဝလို အဖြားယောင်းခံပြီး စားမှာ မဟုတ်ဘူး ဟုတ်လား။ ဒါတော့ ဘယ်သူမှ ပြောမရပါဘူး။ တကယ်တော့ ကျွန်မထင်တယ်လေ ဧဝ ဟာလည်း မြွေ ဖြားယောင်းပြောဆိုတဲ့ ဘုရားသခင်လို အသိဉာဏ်မျိုး ရမယ်ဆိုတဲ့ စကားနဲ့ ဘုရားသခင်က မစားဖို့တားမြစ်ထားတယ်ဆိုတဲ့ ကန့်သတ်ချက် နှစ်ခုကို ယှဉ်တွဲ စဉ်းစားပိုင်းခြားခဲ့လို့သာပါပဲ။ ဒါကိုကြည့်ရင် ကျွန်မတို့ မိန်းမတွေက ပိုပြီး စဉ်းစားချင့်ချိန်စွမ်းပိုမိုတယ် ဆိုရမလား။ စဉ်းစားကြည့်ပေါ့ရှင်ရယ်။ အာဒံတောင် စကားသိပ်မဆိုရဘဲ ဧဝ ပြောတဲ့အတိုင်း တသွေမတိမ်း ချက်ချင်းလိုက်စားသေးတာပဲ။ စောစောက ရှင်တို့ ပြောသလို အာဒံသာဆို မြွေရဲ့ ဖြားယောင်းခြင်းကို ခံရမှာ မဟုတ်ဘူးဆိုတာ ဟုတ်နိုင်ပါ့မလား။ ကျွန်မတောင် သတိတရ ခေါ်မကျွေးဘဲ သူတစ်ယောက်တည်း ဘုရားလိုဉာဏ်ပွင့်ချင်ဇောနဲ့ အကုန်စားပစ်လိုက်မှာ မဟုတ်လားရှင့်။

တကယ်တော့ ကျမ်းစာထဲမှာ၊ သမိုင်းထဲမှာ၊ ရာဇဝင်ထဲမှာ လက်ညှိုးထိုး အပြစ်တင်ခံရတဲ့ မိန်းမသားတွေ အများကြီးပါ။ သူတို့ရဲ့ ခံစားချက်နဲ့ ရပ်တည်ချက်ကိုတော့ ဘယ်သူမှ မလှည့်ကြည့်ခဲ့၊ မစာနာခဲ့ကြ၊ မခံစားပေးခဲ့ကြပါဘူး။ တစ်ခါတရံ ကျွန်မတို့ ကိုယ်၌ကကို မိန်းမသားအချင်းချင်း မထောက်မနိုင်ခဲ့ကြဘူးလေ။ တကယ်တော့ ကျွန်မတို့အားလုံးဟာ ရာဇဝင်ထဲက ကလီယိုပါထရာ၊ သမိုင်းထဲက စုဖုရားလတ် နဲ့ ကျမ်းစာထဲက ဧဝ များသာ ဖြစ်ကြပါတော့တယ်။

(အမျိုးသမီးများကိုယ်စား ရေးဖွဲ့သည်။)

သီဟလုလင်

၁၄ ဇွန်လ ၂၀၁၆