တရားဒေသနာတော်များကို အပတ်စဉ် ဝေမျှခွင့်ရလို့ ဘုရားသခင်ရဲ့ ကျေးဇူးတော်ကို ဦးစွာ ချီးမွမ်းပါတယ်။ အပတ်စဉ်လည်း ထပ်မံ ဝေမျှခွင့်ရဖို့လည်း ဆုတောင်းပါတယ်။ ဒီတစ်ပတ်မှာတော့ ရန်ကုန်ညီအစ်ကိုများ အသင်းတော်မှာ ဇူလိုင်လ (၈) ရက်နေ့က ဝေငှကြားနာခဲ့ရတဲ့ ဆရာကြီး ဦးညွှန့်လှ ရဲ့ "ကိုယ်တော်အားဖြင့် အမှုခပ်သိမ်း" ဒေသနာတော်ကို ပြန်လည်ဝေမျှပေးလိုက်ရပါတယ်။ ဒီတရားတော်များကို အကြောင်းအမျိုးမျိုးကြောင့် အသင်းတော်နဲ့ ဝေးကွာနေကြရတဲ့ ယုံကြည်သူဓမ္မမိတ်ဆွေတိုင်း အသစ်သော ဝိညာဉ်ခွန်အားယူနိုင်ရန်အတွက် ရည်ရွယ်သလို၊ ခရစ်ယာန်ဘာသာကို လေ့လာလိုသူတိုင်းအတွက်လည်း အဆင်ပြေစေဖို့ ရည်ရွယ် ဖော်ပြပေးလိုက်ပါတယ်။ ဖတ်ကြားနာသူအယောက်စီတိုင်းအား ဘုရားသခင်မှ ကြွယ်ဝသောကောင်းကြီးမင်္ဂလာများ အသစ်တဖန်ချပေးသနားပါစေ။ Amen!
ကိုယ်တော်အားဖြင့် အမှုခပ်သိမ်း (ဒေသနာတော်) - ဆရာကြီး ဦးညွှန့်လှ
ယုံကြည်သူခရစ်ယာန်များ တမန်တော်ကြီး ရှင်ပေါလုကို သိကြမည်ဖြစ်သည်။ ရှင်ပေါလုသည် ခရစ်တော်နှင့် မထိတွေ့မီက သူ့အမည်သည် ရှောလုဖြစ်ပါသည်။ ရှောလု အဖြစ်၌ ရှိစဉ် သူသည် အမှုခပ်သိမ်းကို မိမိ အစွမ်းနှင့် ပြုနိုင်သည်ဟု ခံယူထားသူဖြစ်သည်။ အကြောင်းမှာ ရှောလုသည် ပညာတတ်တစ်ယောက် ဖြစ် သည်။ အချို့သောသူများက ကျမ်းစာကျောင်းတက်ပြီး၊ ကျမ်းစာများကို အာဂုံဆောင်ပြီး တရားပလ္လင်ပေါ် တက်၍ တရားဟောပါက လူများအလွန် ခွန်အားရမည်ဟု ထင်တတ်ကြပါသည်။ ထိုသို့သော အားဖြင့် ဟောပြောဝေငှချက်များကို လူများနားထောင်ကောင်းနိုင်ပါသည်။ သို့သော် လူများ ပြောင်းလဲခြင်း ရမည်မဟုတ်ပါ။
ယနေ့ ကျမ်းစာများစွာတတ်ပြီး အပြောကောင်းပါသော်လည်း မလုံလောက်ပါ။ သမ္မာတရားကို ဟောပြောဖို့ အရေးကြီးပါသည်။ အချို့သောအမှုတော်ဆောင်များက မိမိတို့ ဟောပြောလိုက်မှ မိမိတို့ ကျမ်းစာ သင်ပေးလိုက်မှ လူများ နားလည်သဘောပေါက်ပြီး ပြောင်းလဲသွားကြလိမ့်မည်ဟု မှတ်ယူကြသည်။ တမန်တော်ကြီး ရှင်ပေါလုသည်လည်း ရှောလုဘဝက ထိုကဲ့သို့ မိမိတတ်သည်၊ မိမိတော်သည်၊ မိမိသာ မှန်သည်ဟု ကိုယ်ကိုကိုယ် ထင်ပြီး အသက်ရှင်ခဲ့သူ ဖြစ်သည်။ ထိုသို့မဟုတ်ပါ။ လူပုဂ္ဂိုလ်က အရေးမကြီးပါ။ ဘုရားသခင် အတူပါရှိနေဖို့ကသာ အဓိက ဖြစ်သည်ကို ကျွန်ုပ်တို့ သိမှတ်ကြဖို့ လိုပါသည်။
ဘုရားသခင် အတူပါရှိသော အသက်တာ
ဘုရားသခင် အတူပါရှိသော အသက်တာသည် ထူးခြားသော အသက်တာ ဖြစ်ပါသည်။ ကျွန်ုပ်တို့သည် လူပုဂ္ဂိုလ်ကို အဓိက မထားမိဖို့ သတိပြုပါ။ ယုံကြည်သူများ အသက်တာ၌ ကျမ်းစာတတ်ဖို့၊ သိဖို့ထက် ဘုရားသခင် အတူပါရှိနေသော အသက်တာက သာလွန် အရေးကြီးပါသည်။ ယနေ့ ကျမ်းတ်များစွာ ရှိကြပါသည်။ အပြောကောင်းသောသူ၊ အဟောကောင်းသောသူ များစွာ ရှိပါသည်။ လူများစွာကလည်း သူတို့၌ ချဉ်းကပ်တတ်ကြပါသည်။ ကျွန်ုပ်တို့ အသက်တာများသည် လူပုဂ္ဂိုလ်ထက် ဘုရားသခင်ကို ဗဟိုပြု၍ ဆည်းကပ်တတ်သောသူများ ဖြစ်ကြဖို့ အလွန်အရေးကြီးပါသည်။
"ငါဖြစ်လျှင် ဇာတိ၌ ကိုးစားစရာအကြောင်း ရှိ၏။ အခြားသူမည်သည်ကား၊ ဇာတိ၌ ကိုးစားစရာအကြောင်း ရှိသည်ဟု ထင်လျှင် ငါမူကား သာ၍ ရှိ၏။" (ဖိ၊ ၃း၎)
တမန်တော်ကြီး ရှင်ပေါလုက ရှောလုဘဝ၌ မိမိသည် အခြားသူများထက်တော်သည်။ ကျမ်းစာတတ်သည်။ အရပ်မြင့်သည်။ ရုပ်ဆင်းအင်္ဂါခန့်ငြားသည်။ စသည်ဖြင့် ဇာတိ၌ ဝါကြွားစရာ သာ၍ ရှိငည်စု ရှောလုက ထင်မှတ်ပါသည်။ ရှောလုသည် မိမိကိုယ် မိမိ အထင်ကြီးသူ၊ မာန်မာနတတ်နေသူ ဖြစ်သည်။ ဟိုလူက ဘာမို့လို့လဲ၊ စသည်ဖြင့် တဖက်လူကို အထင်သေးနေသူ ဖြစ်သည်။ ကျွန်ုပ်တို့သည် ဘုရားသခင် ရှေ့တော်၌ မိမိတော်သည်၊ တတ်သည်ဟုဆိုကာ လက်မထောင်နေဖို့မဟုတ်။ နှိမ့်ချသောသဘောရှိဖို့ ဘုရားသခင် အလိုတော် ရှိပါသည်။ ကျွန်ုပ်တို့သည် သူဖုန်းစားကဲ့သို့ နှိမ့်နှိမ့်ချချ နေတတ်ဖို့လိုသည်။ ချိုကျိုးနေသော နွား ကဲ့သို့ မှတ်ယူတတ်ဖို့လိုပါသည်။
ချိုထက်သောနွားက အခြားသူများကို ချိုဖြင့် ခွေ့တတ်သည်။ အန္တရာယ်ပြုတတ်သည်။ ချိုကျိုးနေသောနွားက မည်သူ့ကိုမျှ မခွေ့တော့။ အန္တရာယ်လည်း မပြုနိုင်တော့ပါ။
"ငါသည် ရှစ်ရက်မြောက်သောနေ့၌ အရေဖျားလှီးခြင်းကို ခံရ၏။ ဣသရေလအမျိုး၊ ဗင်္ယာမိန်အနွယ် ဖြစ်၏။ ဟေဗြဲလူမှ ဆင်းသက်လာသော ဟေဗြဲလူအစစ်ဖြစ်၏။ တရားအားဖြင့် ဖာရိရှဲ ဖြစ်၏။" (ဖိ၊ ၃း၅)
ရှောလုသည် ရှစ်ရက်မြောက်သောနေ့တွင် အရေဖျားလှီးခြင်းကို ခံရပါသည်။ ထို့အတူ ယနေ့ ခရစ်ယာန်များ က မိမိတို့ နှစ်ခြင်းခံပြီးပြီ။ မိမိတို့က ဟိုအသင်းတော်မှ ဒီအသင်းတော်မှ ဖြစ်သည်ဟု ကြံဖန်ပြီး ဝါကြွားနေ ကြသည်။ ရှောလုက ဣသရေလအမျိုး ဗင်္ယာမိန်အနွယ်ဖြစ်သည်ဟု ဆိုသကဲ့သို့ ယနေ့အချို့သော ခရစ်ယာန်များက မိမိတို့က ဆွေကြီးမျိုးကြီး ဖြစ်သည်။ မိမိတို့ အဖေက ဘယ်သူ၊ မိမိတို့အမေက ဘယ်သူပါ။ မျိုးရိုးစဉ်ဆက် ခရစ်ယာန်များဖြစ်ကြသည်။ ပမွှားမဟုတ်ဟု လက်မထောင်ကြသည်။ ရှောလုက မိမိသည် ဖာရိရှဲဖြစ်သည်ဟု ဆိုပါသည်။ ဖာရိရှဲတို့က အကျင့်တရား၌ အထူးပြောစရာမရှိပါ။ တစ်ပတ်လျှင် နှစ်ရက် အစာရှောင်သည်။ ဆယ်ဖို့တစ်ဖို့ကို သစ္စာနှင့် မပျက်မကွက် ပေးလှူကြသည်။
ရှောလုသည် ဘာသာရေး အရေခြုံထားသူမဟုတ်။ တရားကို အထူးအလေးဂရုစိုက်၍ ကျင့်စောင့်သူ ဖြစ်ပါသည်။ ယနေ့ အချို့ခရစ်ယာန်များက မိမိတို့ ဘုရားကျောင်း မှန်မှန်သွားသည်။ ကျမ်းစာ ခံယူသည်။ ဆယ်ဖို့တစ်ဖို့ မှန်မှန်ပေးသည်ဟု ဆိုကြသော်လည်း အမှန်တကယ် ဝင်ငွေ ကောင်းလာသည့် အခါ ဆယ်ဖို့တစ်ဖို့ ပျက်တတ်ကြပါသည်။ တစ်ရာ၌ တစ်ဆယ်၊ တစ်ထောင်၌ တစ်ရာ၊ တစ်သောင်း၌ တစ်ထောင်၊ တစ်သိန်း၌ တစ်သောင်း ပေးနိုင်ကြသော်လည်း ဆယ်သိန်း ဝင်လာသည့်အခါ တစ်သိန်းပေးဖို့ ခက်လာတတ်ကြသည်။ သိန်းတစ်ရာဖြစ်ပါက ဆယ်သိန်းပေးဖို့ လက်တွန့်လာကြသည်။ ရှောလုက ထိုသို့ မဟုတ်။ တရားကို သစ္စာရှိရှိစောင့်သူ ဖြစ်ပါသည်။
"စိတ်အားကြီးခြင်းကို မေးသော်၊ ငါသည် အသင်းတော်ကို ညှင်းဆဲသောသူ ဖြစ်၏။" (ဖိ၊ ၃း၆)
ရှောလုသည် ဘုရားသခင်ဘက်၌ စိတ်အားကြီးသူ ဖြစ်သည်။ မိမိခံယူချက်ကသာ မှန်သည်။ မိမိ လုပ်ဆောင်ချက်များက မှန်သည်။ ခရစ်ယာန်များ မှားနေသည်။ ထိုသူတို့က ဒိဌိဖြစ်သည်။ လွဲသော အယူကို ယူ၍ အသက်ရှင်နေသောသူများ ဖြစ်သည် ဟု မှတ်ယူနေပါသည်။ ထို့ကြောင့် ခရစ်ယာန်များကို နှိပ်စက် ညှင်းပန်းပြီး ဒုက္ခပေးရသည်ကိုပင် သူမှန်နေသည်ဟု ထင်နေပါသည်။
သခင်ယေရှုကို မျက်မှောက်ပြုပါ
"ဗေရိမြို့သားတို့သည် သက်သာလောနိတ်မြို့သားတို့ထက် ထူးမြတ်သဖြင့်၊ အလွန်ကြည်ညိုသော စေတနာ စိတ်နှင့် နှုတ်ကပတ်တရားတော်ကို ခံယူ၍ မှန်သည် မမှန်သည်ကို သိခြင်းငှာ၊ ကျမ်းစာကို နေ့တိုင်း အစဉ် စေ့စေ့ကြည့်ရှုကြ၏။" (တမန်၊ ၁၇း၁၁)
မိမိတို့ ကိုယ်မိမိတို့ မှန်သည်ဟု ထင်နေသောသူသည် မှားတတ်ပါသည်။ ကျွန်ုပ်တို့ မှန်သည် မမှန်သည်ကို သိဖို့ရန် သမ္မာကျမ်းစာနှင့် တိုင်းတာသိရှိဖို့ လိုပါသည်။ ကျွန်ုပ်တို့သည် ဗေရိမြို့သားတို့ကဲ့သို့ နေ့စဉ် သမ္မာကျမ်းစာကို ဖတ်ရွတ်၍ အသက်ရှင်သောသူ၏များ ဖြစ်ကြဖို့ လိုပါသည်။ ဗေရိမြို့သား တို့သည် နှုတ်ကပတ်တော်ကို ကြားသည့်အခါ အလွန်ကြည်ညိုသော စိတ်နှလုံးနှင့် နားထောင်သည်သာမက မှန်သည် မမှန်သည်ကို သိဖို့ရန် ကျမ်းစာကို နေ့တိုင်းအစဉ် စေ့စေ့ကြည့်ရှုကြသည်ဟု ဖော်ပြထားပါသည်။ ယနေ့ ကျွန်ုပ်တို့သည် ကိုယ်တိုင်သမ္မာတရားကို ခံယူသောသူများ ဖြစ်ကြရုံမျှမက အခြားသောသူများကိုလည်း သမ္မာတရားကို ဟောပြောသက်သေခံသောသူများ ဖြစ်သင့်ကြပါသည်။ တမန်တော်ကြီး ရှင်ပေါလု မဖြစ်မီ ရှောလုသည် ပညတ်တရား၏ အကျင့်တို့ကို ကိုယ်တိုင် လိုက်လျှောက်သောသူ ဖြစ်သဖြင့် အပြစ်တင်စရာ မရှိ၊ အပြစ်တင်ခွင့် နှင့် ကင်းလွတ်သောသူ ဖြစ်သည်ဟု မိမိကိုယ် မိမိ ဆိုပါသည်။ သို့သော် ဒမသက်မြို့သို့ သွားသောလမ်း၌ ခရစ်တော်နှင့် ထိတွေ့ပြီးနောက် အသက်တာပြောင်းလဲသွားခဲ့ပါသည်။ အတွင်းနှလုံးသား ခံယူချက်လည်း ပြောင်းလဲသွားခဲ့ပါသည်။ ထို့ကြောင့် တမန်တော်ကြီး ရှင်ပေါလုက "အပြစ်ရှိသောသူတို့တွင် ငါသည် အကြီးဆုံးဖြစ်၏။" ဟု (၁တိ၊ ၁း၁၅) တွင် ဝန်ခံခဲ့ပါသည်။
မိမိကိုယ်မိမိဟုတ်လှပြီ။ တော်သည်၊ တတ်သည်ဟု ထင်မှတ်ခဲ့သူသည် အဘယ့်ကြောင့် ကျွန်ုပ်တို့၏ အပြင်သဏ္ဍာန်ကို မြင်နိုင်သော၊ အခြေအနေက မည်သို့ ရှိပါစေ။ ဘုရားသခင်က အတွင်းနှလုံးသားကိုသာ ကြည့်ရှု သိမှတ်သော အရှင်ဖြစ်ပါသည်။ ထို့ကြောင့် သခင်ယေရှုက ဖာရိရှဲတို့အား သင်တို့သည် အပြင်၌လည်း အဖြူသုတ်ထားသော သင်္ချိုင်းတွင်းနှင့် တူကြသည်။ အပြင်၌ တင့်တယ်သော အသွင်ဟန်ပန် ရှိသော်လည်း အတွင်း၌ ပုပ်စော်နံနေကြောင်း သတိပေးပါသည်။ (မဿဲ၊ ၂၃း၂၇-၂၈)။ ရှောလုသည် အဘယ့်ကြောင့် ပြောင်းလဲသွားပါသနည်း။ သခင်ယေရှုနှင့် အသက်တာ ထိတွေ့သွားပြီး ယေရှုကို စေ့စေ့ မျက်မှောက်ပြုခဲ့၍ ဖြစ်ပါသည်။
"ယုံကြည်ခြင်းကို အစအဦး စီရင်၍ စုံလင်စေတော်မူသော ခရစ်တော်အားဖြင့် ခပ်သိမ်းသောအမှုတို့ကို ငါတတ်စွမ်းနိုင်၏။" (ဟေ၊ ၁၂း၂)
ကျွန်ုပ်တို့သည် သခင်ယေရှုကို စေ့စေ့ထောက်ရှုလျက် အသက်ရှင်ကြဖို့ လိုပါသည်။ တမန်တော်ကြီး ရှင်ပေါလုက ထိုသို့ အသက်ရှင်ခဲ့၍ (ဖိ၊ ၄း၁၃) တွင်
"ငါ့ကို ခွန်အားနှင့် ပြည့်စုံစေတော်မူသော ခရစ်တော်အားဖြင့် ခပ်သိမ်းသောအမှုတို့ကို ငါတတ်စွမ်းနိုင်၏။" ဟု ဝန်ခံခဲ့ပါသည်။
ပေတရုသည် သခင်ယေရှု ရေပေါ်၌ လျှောက်လှမ်းလာသည်ကို မြင်လျှင် မိမိသည် ရေပေါ် ၌ လျှောက်ရသော အခွင့်ကို ပေးပါဟု တောင်းလျှောက်၍ လာခဲ့လော့ဟု မိန့်တော်မူသည့် အတိုင်း ပေတရုသည် ကိုယ်တော်အားဖြင့် ရေပေါ်၌ လျှောက်နိုင်ရသောအခွင့် ရခဲ့ပါသည်။ (မာ၊ ၉း၂၃) တွင် သခင်ယေရှုက ကိုယ်တော်သည် အရာခပ်သိမ်းကို တတ်နိုင်သည်ဟု ယုံကြည်နိုင်သလားဟု မေးခဲ့ပါသည်။ ထိုသို့ ယုံကြည်နိုင်ပါက ခပ်သိမ်းသောအမှု၌ ကိုယ်တော်၏ မစခြင်းကို ခံစားကြရမည် ဖြစ်ပါသည်။
"ငါနှင့်ကွာလျှင် သင်တို့သည် အဘယ်အမှုကိုမျှ မတတ်နိုင်ကြ။" (ယော၊ ၁၅း၅)
ကျွန်ုပ်တို့သည် သခင်ယေရှုနှင့်ကွာလျှင် မည်သည့်အမှုကိုမျှ မတတ်နိုင်ကြပါ။ ကျွန်ုပ်တို့သည် သခင်ယေရှုကို စေ့စေ့ကြည့်၍ လျှောက်လှမ်းကြဖို့ လိုပါသည်။ ထိုသို့ ကြည့်၍ လျှောက်လှမ်းနေသမျှ အသက်တာ၌ အောင်မြင်ခြင်းခံစားကြရမည် ဖြစ်သည်။ မည်သည့်အခါမျှ ဆုံးရှုံးခြင်းကို တွေ့ရမည် မဟုတ်ပါ။
ကိုယ်တိုင်ခံယူသည့်အတိုင်း
ကျွန်ုပ်တို့သည် သခင်ယေရှုကို စေ့စေ့ကြည့်နေပါက သခင်ယေရှုနည်းတူ အသက်ရှင်နိုင်ကြမည် ဖြစ်သည်။
"ငါ့ထမ်းဘိုးကို တင်၍ ထမ်းကြလော့။ ငါ့ထံ၌ နည်းခံကြလော့။ ငါသည် နူးညံ့သိမ်မွေ့နှိမ့်ချသော စိတ်သဘော ရှိ၏။ သင်တို့ စိတ်နှလုံးသည် သက်သာခြင်းကို ရလိမ့်မည်။" (မဿဲ၊ ၁၁း၂၉)
ကျွန်ုပ်တို့သည် သခင်ယေရှု၏ စိတ်နေသဘောထားအတိုင်း အသက်ရှင်ကြဖို့ လိုပါသည်။ ငါတတ်သည်၊ ငါတော်သည်ဟု မည်သည့်အခါမျှ မဆိုပါနှင့်။ မမောက်မာ မဝါကြွားပါနှင့်။ ဘုရားသခင်၏ ကျေးဇူးတော်ကို အစဉ်ချီးမွမ်းလျက် ကိုယ်တော်နည်းတူ နှိမ့်ချသောစိတ်သဘောနှင့် အသက်ရှင်ပါ။ ဘုရားသခင် သည် နှိမ့်ချသော စိတ်သဘော ရှိသူတိုင်းအား ချီးမြှောက်တော်မူပါသည်။ နှိမ့်ချသောအသက်တာသည် နိမ့်ကျသောအသက်တာ မဟုတ်ပါ။ နှိမ့်ချသောစိတ်သဘောဖြင့် အသက်ရှင်ခြင်းသည် ဘုရားသခင်၏ အလိုတော် ဖြစ်ပါသည်။ သခင်ယေရှုကကို စေ့စေ့မျှော်ကြည့်ပြီး အသက်ရှင်နေသေူသူသည် မျှော်လင့်ခြင်း ရှိသူ ဖြစ်သည်။ ဤလောက၌ အသက်ရှင်စဉ် မျှော်လင့်ခြင်းရှိသလို၊ သေလွန်သောအချိန်၌လည်း ထိုသူသည် မျှော်လင့်ခြင်းရှိသူ ဖြစ်သည်။ နေ့စဉ် ဘုရား၏ မစမှု၊ ကျွေးမွေးမှု၊ ကွယ်ကာမှုတို့ကို အစဉ် ခံစားရပါသည်။ သခင်ယေရှုကို စေ့စေ့မျှော်ကြည့်လျက် အသက်ရှင်သောသူသည် မည်သည့် အခါမျှ မျှော်လင့်ခြင်း မမဲ့ပါ။ နံနက်တိုင်း အသစ်သောကောင်းကြီးကို ခံစားကြရပါသည်။
ကောင်းကြီးပေးပါဟု ဆုတောင်းနေဖို့ မဟုတ်ပါ။ နေ့သစ်အတွက် ဘုရားသခင်က ကောင်းကြီးပေးပြီး ဖြစ် ပါသည်။ ထိုကောင်းကြီးကို တွေ့အောင် ရှာဖို့သာ ဖြစ်ပါသည်။ ချစ်သောမိတ်ဆွေ ယနေ့ သင့်အတွက် ဘုရားသခင် ပြင်ဆင်ပေးထားသော ကောင်းကြီးကို တွေ့ပြီလား။ သခင်ယေရှုက ရှာကြလော့။ ရှာလျှင်တွေ့မည်ဟု မိန့်တော်မူပါသည်။ အချို့သောသူတို့က မိမိတို့ အသက်တာ၌ ဘုရားသခင် ကောင်းကြီး မင်္ဂလာကို မတွေ့ပါဟု ဆိုတတ်ကြပါသည်။ ထိုသူများမှာ မရှာသောသူများ ဖြစ်သည်။ ကျွန်ုပ်တို့သည် အသက်တာ၌ ဘုရားသခင် ကောင်းကြီးပေးထားသော အရာများကို မရှာပါက တွေ့ကြမည် မဟုတ်ပါ။
"ယုံကြည်ခြင်းသည် မျှော်လင့်သောအရာတို့ကို မျက်မှောက်ပြုခြင်း ဖြစ်သည်။" ကျွန်ုပ်တို့သည် ဘုရားသခင် ထံတော်မှ ကောင်းကြီးမင်္ဂလာကို ယုံကြည်ခြင်းဖြင့် မျှော်လင့်လျက် အသက်ရှင်ကြဖို့ လိုပါသည်။ ထိုသို့သော သူသည် ဧကန်အမှန် ဘုရားသခင်ထံမှ ကောင်းကြီးကို ခံစားရသောသူ ဖြစ်ပါသည်။ ကျွန်ုပ်တို့ ခရစ်တော်၌ ရှိနေသော အသက်တာကို အခြားသူများ သိမြင်ကြဖို့ လိုပါသည်။ ကျွန်ုပ်တို့၌ ရှိနေသောအရာကို အခြားသူများအား ပေးကြဖို့ ဘုရားသခင် အလိုတော် ရှိပါသည်။ ကျွန်ုပ်တို့သည် အခြားသူများကို ပေးသည့် အခါ မိမိ၌ ရှိသော အရာကိုသာ ပေးနိုင်ပါသည်။ မရှိသောအရာကို မပေးနိုင်ပါ။
သခင်ယေရှုက -
"ဝန်လေး၍ ပင်ပန်းသောသူအပေါင်းတို့ ငါ့ထံသို့ လာကြလော့။ ငါသည် ချမ်းသာပေးမည်။" (မဿဲ၊ ၁၁း၂၈) ဟု မိန့်တော်မူပါသည်။ သို့သော် အများက မလာကြပါ။ အဘယ့်ကြောင့် မလာကြပါသနည်း။ မယုံ၍ မလာကြခြင်း ဖြစ်ပါသည်။
"ငါသည် ကိုယ်တိုင်ခံယူသည်အတိုင်း သင်တို့အား ရှေးဦးစွာ အပ်ပေးသော အကြောင်းအရာ ဟူမူကား၊" (၁ကော၊ ၁၅း၃)
ကျွန်ုပ်တို့သည် ကိုယ်တိုင် ယေရှုခရစ်တော်ကို ယုံကြည်ခြင်းအားဖြင့် ခံယူရရှိထားသောသူများ ဖြစ်ဖို့ လိုပါသည်။ ကျွန်ုပ်တို့သည် ယေရှုခရစ်ကို အသက်တာ၌ ရရှိမထားဘဲ အခြားသူများ ယေရှုခရစ်ကို ရရှိဖို့ရန် မကူညီပေးနိုင်ပါ။ မိမိ၌ မရှိသောအရာကို အခြားသူများအား မပေးနိုင်ပါ။
တမန်တော်ကြီး ရှင်ပေါလုက အသက်တာ၌ ကိုယ်တိုင်ခံယူရရှိထားသော ခရစ်တော်ကို အခြားသူများ ရဖို့ ပေးနေခြင်း ဖြစ်ပါသည်။
"ငါသည် ခရစ်တော်၏နည်းတူကျင့်သကဲ့သို့ သင်တို့သည်လည်း ငါ့နည်းတူ ကျင့်ကြလော့။" (၁ကော၊ ၁၅း၁)
တမန်တော်ကြီး ရှင်ပေါလုက ငါသည် ခရစ်တော်နည်းတူ ကျင့်သကဲ့သို့ သင်တို့သည်လည်း ခရစ်တော်နည်းတူ ကျင့်ကြပါဟု မပြောပါ။ တမန်တော်ကြီးက ငါသည် ခရစ်တော်နည်းတူ ကျင့်သကဲ့သို့ ငါ့နည်းတူ ကျင့်ခြင်းသည် ခရစ်တော်နည်းတူကျင့်ခြင်း ဖြစ်သည်ဟု ဆိုပါသည်။ ခရစ်တော်နည်းတူ မည်သို့ ကျင့်ရမည်ကို မသိ ဖြစ်နေသူများအား မည်သို့ကျင့်ကြံပြုမူရမည်ကို ကိုယ်တိုင်ကျင့်၍ လမ်းပြနေခြင်း ဖြစ် ပါသည်။ တမန်တော်ကြီးက မိမိ၌ ရှိသောအရာကိုသာ အခြားသူများကို ပေးနေခြင်း ဖြစ်ပါသည်။
ချစ်သောညီအစ်ကိုမောင်နှမများ မကြာမီ သခင်ယေရှုခရစ်တော် ပြန်၍ ကြွလာတော့မည် ဖြစ်ပါသည်။ ကျွန်ုပ်တို့သည် ခရစ်တော်ကို မျှော်လင့်လျက် အသက်ရှင်နေကြပြီလား။ ကိုယ်တော်ကို မျှော်လင့်လလျက် အသက်ရှင်သောသူသည် စိတ်ပျက်ခြင်းမရှိ၊ အစဉ်ဝမ်းမြောက်နေသောသူ ဖြစ်သည်။ ကျွန်ုပ်တို့သည် ကိုယ်တော်ထံ၌ နည်းခံလျှက် အသက်ရှင်နေကြပါသလား။ ခရစ်တော် မည်ကဲ့သို့ အသက်ရှင်ခဲ့ပါသနည်း။ ဆင်းရဲစွာ အသက်ရှင်ခဲ့ပါသည်။ ကိုယ်တော်သည် လောကသို့ ကြွလာသောအခါ ခေါင်းချစရာ နေရာပင် မရှိခဲ့ပါ။ ယနေ့ ခရစ်ယာန်များက ကြွယ်ဝချမ်းသာဖို့ရန် အာရုံစိုက်၍ အသက်ရှင်နေကြသည်။ ခရစ်တော်သည် နှိမ့်ချစွာ အသက်ရှင်ခဲ့ပါသည်။ ကျွန်ုပ်တို့သည် ခရစ်တော်နည်းတူ နှိမ့်ချစွာ အသက်ရှင်ကြဖို့ ကိုယ်တော်အလိုတော် ရှိပါသည်။ ကျွန်ုပ်တို့အသက်တာ၌ရှိသော အရာကိုသာ အခြားသူများကို ပေးနိုင်မည် ဖြစ်ပါသည်။ ကျွန်ုပ်တို့အသက်တာ၌ ကိုယ်တော် ရှိပါသလား။ ကျွန်ုပ်တို့ အသက်တာ၌ ကိုယ်တော်ရှိပါက ကိုယ်တော်ထံမှ ရသောခွန်အားဖြင့် အမှုခပ်သိမ်းကို ကျွန်ုပ်တို့သည် အောင်မြင်စွာ ပြုနိုင်ကြမည်ဖြစ်ကြောင်း မေတ္တာဖြင့် အသိပေးဝေငှလိုက်ပါသည်။
Posts
0 comments:
Post a Comment