ဘုရားသခင်၏ သာသာနာ (ဒေသနာတော်)

ဇူလိုင်လ တစ်ရက်နေ့ကို ရောက်ရှိလာပါပြီ။ အပတ်စဉ် ကျေးဇူးတော်ကြောင့် ဒေသနာတော်များကို ကျွန်တော့ Blog ကနေ တစ်ဆင့်ပြန်လည် ဝေငှနိုင်သောအခွင့်အတွက် ကြည်နူးပီတိဖြစ်မိပါတယ်။ အသင်းတော်ရဲ့ အဝေးကို အကြောင်းအမျိုးမျိုးကြောင့် ရောက်ရှိနေရသူတိုင်း ဝိညာဉ်ရေးရာခွန်အား တိုးတက် ရရှိနိုင်မယ်လို့လည်း မျှော်လင့်မိပါတယ်။ အခုတစ်ပတ်မှာလည်း ဆရာကြီး ဦးယောသပ် ဟောကြားခဲ့ဖူးတဲ့ "ဘုရားသခင်၏ သာသနာ" ဒေသနာတော်ကို ပြန်လည်ရှာဖွေလို့ တင်ပြ မျှဝေလိုက်ရပါတယ်ခင်ဗျာ။ ဖတ်ကြားနာသူအယောက်စီတိုင်းအား ဘုရားသခင် ကောင်းကြီးပေးပါစေ။ Amen!

နိဒါန်း

ယနေ့ ခရစ်ယာန်သာသာနာနယ်ပယ်ကို အာရုံပြုလျက် စေ့စေ့လေ့လာလိုက်သောအခါ ဘယ်လိုခံစား သိရှိတွေ့မြင်လာရပါသလဲ။ Don Fleming ဆိုတဲ့ ပုဂ္ဂိုလ်၏ အာဖရိကနိုင်ငံရှိ အသင်းတော်များကို လေ့လာတွေ့ ရှိချက်အရ၊ အနောက်နိုင်ငံမှ ရေးသားပြုစုသော ခရစ်ယာန်စာပေစာအုပ်တို့တွင် အာဗြဟံ၊ မောရှေ၊ ဒါဝိဒ် ဟူ၍ ခေါင်းစီးတပ်ပြီး ပုံနှိပ်ထုတ်ဝေနေရာ၊ အသင်းလူကြီးတို့သည် စက်တပ်လှေအတွက် ဒီဇယ်ဆီရရန် သမီးများကို ပြည့်တန်ဆာလုပ်ဖို့ ခွင့်ပြုနေတဲ့အထိ ဝိညာဉ်ရေးရာ နိမ့်ကျလျက် ရှိပါသည်။ ထိုအမှားကို ပြင်ဆင်နိုင်ရန် အသစ်ထုတ်ဝေသော ခရစ်ယာန်စာပေများတွင် အာဗြဟံကို ခေါ်တော်မူသော ထာဝရဘုရား၊ မောရှေနှင့် လူမျိုးတော်ကို ဦးဆောင်သော ယေဟောဝါဘုရား၊ ဒါဝိဒ် ကိုးကွယ်ဆည်းကပ်သော ဣသရေလအမျိုးတို့၏ အရှင် ထာဝရဘုရားသခင် ဟူ၍ လူပုဂ္ဂိုလ်ထက် ထာဝရဘုရားကို အာရုံပြုစေသောအခါ၊ ဝိညာဉ်ရေးရာ ပြန်လည်နိုးကြားလာ၍ ထာဝရဘုရားကို ကြောက်ရွံ့ ရိုသေမှု ရှိလာပြီး၊ ဒုစရိုက်ကိုလည်း အလွယ်တကူ မပြုရဲတော့ပါ။

လူသားကမ္ဘာကို အုပ်စိုးတော်မူသော ထာဝရဘုရား

ထာဝရဘုရားရှင်သည် လူသားကမ္ဘာကို စီရင်ခွဲခန့်အုပ်စိုးတော်မူရာ၌၊ လောကိမင်းကို အာဏာစက် ပေးအပ်၍ သားတော်၏ အသင်းတော်အား ဓမ္မစက်ကို အပ်နှံထားပါသည်။ ဣသရေလ လူမျိုးတော်သည် ထာဝရဘုရားကို မထီမဲ့မြင်ပြု၍ ပညတ်တော်ကို ချိုးဖောက်တဲ့အခါ၊ ဗာဗုလုန်နိုင်ငံ သက်ဦးဆံပိုင် နေဗုဒ်ခဒ်နေဇာလက်အောက်၌ အစေခံကြရပါသည်။ ထိုအခါမှ ထာဝရဘုရားသည် လူမျိုးတကာတို့၏ အရှင်လည်းဖြစ်ကြောင်းကို သိလာရပါသည်။ လူမျိုးတော်အထဲမှ ထာဝရဘုရားကို ကြောက်ရွံ့သောလုလင် (၄) ဦး ဖြစ်သည့် ဒံယေလ၊ ဟာနနိ၊ မိရှေလ၊ အာဇရိတို့အားဖြင့် ထာဝရဘုရား၏ ဘုန်းထင်ရှား၍ နေဗုဒ်ခဒ်နေဇာ ပင်လျှင် ထာဝရဘုရားသည် ကြီးမြတ်တော်မူကြောင်း အသိအမှတ်ပြုရလျက်၊ ထိုထာဝရဘုရားကို မထီမဲ့မြင်ပြုလျှင် မင်းမျက်သင့်မည်ဖြစ်ကြောင်း အမိန့်တော် ထုတ်ရသည်အထိ ထိုလုလုင်လေးဦးတို့၏ ပုံသက်သေအလင်းသည် ထက်မြက်ထိရှပါ၏။

မဟာတ္တမဂန္တီသည် ခရစ်ဝင်ကျမ်းပါ ခရစ်တော်၏ တောင်ပေါ်စေသနာနှင့် စွန့်လွှတ် အနစ်နာခံခြင်း ဖြစ်သည့် တပည့်တော်လမ်းစဉ်ကို  အလွန်နှစ်ခြိုက်ပါသော်လည်း အနောက်တိုင်း သာသနာပြုတို့၏ အပေါ်စီးမှ ချဉ်းကပ်မှု၊ လူမှုဆက်ဆံရေး၌ ညံ့ဖျင်းမှု၊ ငွေကြေးဖြင့် ချုပ်ကိုင်မှုတို့ကြောင့် ခရစ်ယာန်တစ်ဦး ဖြစ်မလာရကြောင်း ဖတ်ရှုရပါသည်။ မာသာထရီဇာ၏ ကိုယ်တိုင် အနစ်နာခံလျက် မိမိ ရှိသမျှနှင့် ဆင်းရဲသား အပယ်ခံ၊ ရောဂါကျွမ်း၍ သေခါနီးဝေဒနာရှင်တို့အား ကိုယ်ဖိရင်ဖိ ပြုစုစောင့်ရှောက် လာတဲ့အခါ၊ အာဏာပိုင်များပင်လျှင် သူ့လုပ်ဆောင်မှုကို အသိအမှတ်ပြု၍ ယေရှုအသက်ရှင်ကြောင်းကို ဝန်ခံကြရပါသည်။

ထာဝရဘုရား ကြည့်ရှုစီရင်

မဆလခေတ်က နိုင်ငံတော်အကြီးအကဲ လေးစားရသော ထာဝရဘုရားနှင့် သားတော် ယေရှုခရစ်တော် ကို ကြောက်ရွံ့ရိုသေချစ်မြတ်နိုးသည့် ပုဂ္ဂိုလ်ကြီးသုံးဦးမှာ ဗိုလ်မှူးကြီး ခွန်နောင်၊ ဗိုလ်မှူး ထွန်းမြတ် နှင့် ဦးခင်ဇာမုံ တို့ ဖြစ်ကြောင်း ပန်းသတင်းလေညှင်းဆောင် လူသတင်းလူချင်းဆောင်၍ ကြားသိခဲ့ရပါသည်။ ယနေ့ နိုင်ငံတော် အသွင်ကူးပြောင်း တိုးတက်ဖွံ့ဖြိုးလာသောအခါသမယတွင်ပင်၊ ထာဝရဘုရား ကို ကြောက်ရွံ့၍ ပညာဉာဏ်ထက်မြက်ပြိး၊ မင်းပေးတာဝန်ကို သစ္စာနှင့် ဖြောင့်မတ်ခြင်းနှင့် ထမ်းရွက်လျက် မိမိတို့ ယုံကြည်ကိုးကွယ်မှုကို အပေးအယူမလုပ်ဘဲ၊ မြဲမြံခိုင်ခံ့စွာ ရပ်တည်လျက်ရှိကြသော၊ ဘုရားရှင် ခွဲခန့်ထားသည့် ပြည်သူ့လွှတ်တော်အမတ်များ ရှိကြောင်း၊ ကြားသိရ၍ ခွန်အားရရှိလျက် ထိုသူတို့နှင့်အတူ နိုင်ငံတော်အစိုးရအတွက် ပိုမို ဆုတောင်းပဌနာပြုလျက်၊ မေတ္တာပို့သ ဖို့ရန် နိုးဆော်ခံရပါသည်။ (ရောမ၊ ၁၃း၁-၇၊ ကော၊ ၃း၂၂-၂၅၊ ၁တိ၊ ၂း၁-၇)

ခရစ်ယာန်ဘာသာ၊ သာသနာနှင့် ထာဝရဘုရားသခင် ၏ နိုင်ငံတော် သာသနာ

အဘဆရာကြီး၏ ဝေငှရှင်းလင်းချက်မှ သိသာထင်ရှားလာသည့် သာသနာလုပ်ဆောင်ချက်ကြီး နှစ်မျိုးမှာ၊ ဘာသာ၊ သာသနာ နှင့် နိုင်ငံတော်သာသာနာပင် ဖြစ်ပါသည်။ ခရစ်ယာန်ဘာသာ၊ သာသနာတွင် စီမံကိန်းများ ရေးဆွဲ၍ ဘဏ္ဍာငွေ ရှာပြီး လုပ်ဆောင်မည့်သူများ စုဆောင်း၍၊ မိမိတိုပ အဖွဲ့အစည်း သင်္ကေတ၊၊ အမည်တပ်၍ ကွဲပြားခြားနားသော ဟောပြောချက်၊ ကိုယ်ပိုင်ခံယူချက်တို့ဖြင့် ဟိုတစ်စု၊ ဒီတစ်ဖွဲ့ဖြင့် လှုပ်လှုပ်ရှားရှား သာသနာလုပ်ငန်းများကို လုပ်ဆောင်လျက် ရှိကြပါသည်။ ပြည်ပ သာသာနာ အဖွဲ့အစည်းများနှင့်လည်း ပူးပေါင်းဆောင်ရွက်ပြီး ပြည်ပ ပံ့ပိုးမှုကို မျှော်ကိုးလုပ်ဆောင်လာကြသဖြင့် ကာလံ၊ ဒေသံ၊ ယဉ်ကျေးမှုဓလေ့ထုံးစံများကို လျစ်လျူရှုမိခဲ့ကြသဖြင့် သက်သေအလင်း ထိရောက်မှု နည်းပါးလာပြီး အခြားဘာသာဝင်များအတွက်လည်း အမြင်မရှင်း၊ ရှုပ်ထွေးစရာများ ဖြစ်စေလျက် ထာဝရဘုရားနှင့် သားတော်ယေရှုခရစ်တော်နှင့် ထိတွေ့မှုမရရှိဘဲ ကွဲပြားသော ဘာသာရေးခံယူချက်များဖြင့်သာ မချင့်မရဲ ဖြစ်နေကြရပါသည်။ သမ္မာကျမ်းစာ၏ သြဝါဒများကိုလည်း ဝါဒ လုပ်လိုက်ကြသဖြင့် ယုံကြည်သူအချင်းချင်းပင်လျှင် မိဿဟယ ပျက်ပြားလာရပါသည်။

ထာဝရဘုရား၏ နိုင်ငံတော်သာသနာမှာမူကား၊ တမန်တော်ဝတ္ထုအခန်းကြီး ၂ ရှိ၊ ကနဦး အသက်ရှင်သော အသင်းတော်၏ အသွင်ကို အထူးအလေးပြု ဂရုထားပြီး အသက်ရှင်တော်မူသော သားတော် ယေရှု ခရစ်တော်ကို ဦးထိပ်ထား၍ တမန်တော်တို့၏ သြဝါဒကို ရိုးသားစွာ ဝန်ခံလုပ်ဆောင်၍ သန့်ရှင်းသော ဝိညာဉ်တော် လမ်းပြမှုကိုသာ ငံ့လင့်၍ ကိုယ်တော်အသက်ရှင်ကြောင်း သက်သေထင်ရှားရန်၊ မိမိတို့လက်ဝယ်ရှိသည့် ပိုင်ဆိုင်သည့် အရာများကို မျှဝေပါဝင်သုံးစွဲခြင်းဖြင့် ဧဝံဂေလိတရားကို ဝမ်းမြောက်ခြင်းနှင့် ဟောပြော ဝေငှ သက်သေခံတတ်ကြပါသည်။ ထာဝရဘုရားရှင်သည်လည်း သားတော်၏ နာမတော်နှင့် လုပ်ဆောင်ချက် ဆုတောင်းချက်တို့ကို နှုတ်ကပတ်တော်ကို အတည်ပြုဖို့ရန် မိမိဘုန်းတော် အဘို့အလို့ငှာ တန်ခိုးနိမိတ်လက္ခဏာများဖြင့် သက်သေထင်ရှားစေပါသည်။

တမန်တော်တို့ ခံယူသော ဧဝံဂေလိတရား

ညီအစ်ကိုတို့ ငါသည် သင်တို့အား ဟောပြောခဲ့ပြီးသည်အတိုင်း သင်တို့သည် ခံယူ၍ မှီဝဲဆည်ကပ်သော ဧဝံဂေလိတရားကို သင်တို့အား နောက်တစ်ကြိမ် ငါထပ်ပြောကြားလိုက်ပါသည်။ အရင် ငါပြောခဲ့ပြီးတဲ့ အကြောင်းအရာများကို သင်တိုပသည် အချည်းအနှီးမဲ့ မယုံဘဲ၊ အမှန်တကယ် စိတ်စွဲလန်းလျှင် ထိုဧဝံဂေလိတရားအားဖြင့် သင်တို့သည် ကယ်တင်ခြင်းသို့ ရောက်ရကြ၏။

ငါသည် ကိုယ်တိုင်ခံယူသည်အတိုင်း သင်တို့အား အစကနဦးကတည်းက အပ်နှံခဲ့သည့်အကြောင်းအရာ ဟူမူကား ခရစ်တော်သည် ကျမ်းစာလသည်အတိုင်း ငါတို့အပြစ်ကြောင့် အသေခံတော်မူ၏။ သင်္ဂြိုလ်ပြီးမှ၊ ကျမ်းစာလာသည်အတိုင်း သုံးရက်မြောက်သောနေ့၌ ထမြောက်တော်မူ၏။ ကေဖသည် ကိုယ်တော်ကို မြင်ပြီးမှ တစ်ကျိပ်နှစ်ပါးအဝင်ဖြစ်သူတို့သည် မြင်ရကြ၏။ ထို့နောက် ညီအစ်ကို ငါးရာမက တပြိုင်နက် မြင်ရကြ၏။ ထို့နောက် ယာကုပ်မြင်ရ၏။ နောက်မှ တမန်တော် (၁၁) ပါးတို့သည် မြင်ရကြ၏။ နောက်ဆုံး၌ အချိန်မတော်မတန်ဘွားသောသူကဲ့သို့ ငါပေါလုပင် မြင်ရ၏။ (၁ကော၊ ၁၅း၁-၈)

သားတော်နှင့် ပတ်သက်၍ ခမည်းတော်၏ တစ်ခုတည်းသော အလိုတော်

ယေရှုသည်သက်တော် (၃၀) နှစ်၌ နိုင်ငံတော်နှင့် ယှဉ်သော ဧဝံဂေလိတရားကို မဟောပြောမီ၊ ယောဒန်မြစ်၌ ပရောဖက်ယောဟန်အားဖြင့် ဗတ္တိဇံမင်္ဂလာကို ခံယူပြီးနောက် ရေမှ ပေါ်ထစဉ်

"ကောင်းကင်ဖွင့်လှစ်သဖြင့်၊ ဝိညာဉ်တော်သည် ချိုးငှက်ကဲ့သို့ ဆင်းသက်၍၊ ကိုယ်တော်အပေါ် နားတော်မူ၍၊ ဤသူကား ငါနှစ်သက်မြတ်နိုးရာ ငါ၏ ချစ်သားပေတည်း။" ဟုကောင်းကင်က အသံတော် ဖြစ်၏။ လက်ဝါးကပ်တိုင်၌ အသေမခံမီ၊ တောင်တော်ပေါ်၌ သဏ္ဍာန်တော်ပြောင်းလဲ၍ မောရှေ နှင့် ဧလိယတို့သည် ကိုယ်ထင်ရှား၍ စကားပြောကြပြီးနောက်၊ မိုးတိမ်သည် အိပ်ချင်မူတူးဖြစ်နေသည့် တမန်တော် သုံးဦးအား လွှမ်းခြုံလျက်

"ဤသူကား ငါ၏ ချစ်သားပေတည်း။ သူ၏ စကားကို နားထောင်ကြလော့။" ဟု မိုးတိမ်က အသံတော် ဖြစ်တော်မူပါသည်။

ကောင်းကင် မြေကြီးတို့ကို ဖန်ဆင်းတော်မူ၍ ကျွန်ုပ်တို့၏ ခန္ဓာအသက်ကို  ပေးပိုင်၊ နုတ်ပိုင်တော်မူသော ထာဝရအရှင် ဘုရားသခင်၏ သားတော်နှင့် ပတ်သက်၍ အကြွင်းမဲ့ နာခံဘို့ မိန့်တော်မူချက်ကို ကျွန်တော်၊ ကျွန်မတို့ ဘယ်လို တုံ့ပြန်နေပါသနည်း။ မထီမဲ့မြင်ပြုဖို့ရန်လည်း အခွင့်မရှိပါ။ သားတော်၏ နှုတ်ထွက်စကားမှာ

"ငါ့ကို ပယ်၍ ငါ့စကားကို နားမခံသောသူအား၊ အပြစ်စီရင်သောသူ ရှိသေး၏။ ငါဟောပြောသော စကားပင်၊ နောက်ဆုံးသောနေ့၌ ထိုသူအား အပြစ်စီရင်လိမ့်မည်။" (ယော၊ ၁၂း၄၈)

ကျွန်တော် ကျွန်မတို့လည်း ဓမ္မသစ်အသင်းတော်၏ ယုံကြည်ချက်၊ အုတ်မြစ်ဖြစ်သော ယေရှုခရစ်တော်၏ အသေခံခြင်း၊ တက်ကြွတော်မူခြင်းနှင့် တဖန်ကြွလာခြင်းအကြောင်းတို့ကို လေးလေးနက်နက် နားလည် သဘောပေါက် ၍ ခံယူကျင့်သုံးလက်တွေ့ အသက်ရှင်ဖို့ရန် အမှန်ဘဲ လိုအပ်ပါသည်။

သေခြင်းတရားနှင့် ယေရှုခရစ်အသေခံတော်မူခြင်း

ကျွန်တော် လွန်ခဲ့သော သောကြာနေ့က အောင်မင်္ဂလာ ခရစ်ယာန်ဂိုဏ်းပေါင်းစုံ သင်္ချိုင်းသို့ သွား​၍ ယောက်ဖ ၏ ကျန်ရစ်သော ရုပ်အလောင်းမြေသို့ အပ်နှံခြင်းတွင် ပါဝင်နေစဉ်၊ ပတ်ဝန်းကျင်သို့ ကြည့်ရှုရာ အသင့်လုပ်ထားသော အုတ်ဂူများကို တွေ့ရပါသည်။ ယခင်ကလို မြေကြီးအောက် ခြောက်ပေ မဟုတ်တော့ဘဲ၊ မြေကြီးပေါ်မှာဘဲ အုတ်ဂူကိုလုပ်ဖို့ သတ်မှတ်ထားပါသည်။ လူသည် ရုတ်တရက် ကွယ်လွန်ခြင်း မဟုတ်ဘဲ၊ သေဖို့ရန်သာ မွေးလာခြင်း ဖြစ်ပါသည်။ သေခြင်းတရားကို အလေးအနက် မစဉ်းစားသေးသူသည် ပညာမဲ့ရာရောက်ပြီး အတ္တမာန်မာန၊ ကိုယ်ကာယတပ်မက်ခြင်းနဲ့ဘဲ အဆုံးသတ်သွားရမှာ ဖြစ်ပါသည်။

အသက်ရှင်ဖို့ရန် ကြိုးစားရုန်းကန်ရှာဖွေ စားသောက်နေစဉ် သေခြင်းတရားကို ဆင်ခြင်တတ်ဖို့ လိုပါသည်။ လူသားတိုင်းဟာ အပြစ်ပြုတတ်တဲ့ အာဒံ၏ ဇာတိပကတိ သဘာဝနှင့် မွေးဖွားလာရ၍ အပြစ်တရား၏ အခမှာ သေခြင်းဖြစ်၍ လူဟာ ယနေ့ခန္ဓာပျက်စီးပြီး တရားစီရင်ခံရ၍ ထာဝရမီးအိုင်ထဲ သက်ဆင်းရပါမည်။ သို့သော်လည်း ဝမ်းမြောက်စရာသတင်းမှာ ယေရှုခရစ်သည် ကျွန်ုပ်တို့ကိုယ်စား အသေခံတော်မူ၍ ကိုယ်တော်ကို ယုံကြည်ကိုးစားလက်ခံသူတိုင်း အပြစ်လွှတ်ခြင်း ကျေးဇူးခံရပြီး ဘုရားသားသမီး ဖြစ်ခွင့် ရလာပါသည်။

ယေရှုခရစ်တော်ဟာ ကျွန်ုပ်တို့အပြစ်အတွက် အသေခံခြင်းသာ မဟုတ်ဘဲ ကျွန်ုပ်တို့ရဲ့လူဟောင်းကြီး ကိုလည်း ကားတိုင်၌ ဒါဏ်ခတ်ခဲ့ပါသည်။ ဒီ့အပြင် လူသားကို ချုပ်နှောင်ထားတဲ့ သေမင်းတည်းဟူသော စာတန်မာရ်နတ်၏ တန်ခိုးကိုလည်း ချိုးဖျက်နိုင်ခဲ့ပါသည်။ (ရောမ၊ ၈း၃၊၄၊ ဂလာ၊ ၂း၂၀၊ ဟေဗြဲ၊ ၂း၎) ယေရှုနှင့် အတူ အသေခံပြီဟု သိမှတ်ခံယူနိုင်သူသည် ဇာတိ၊ လောက၊ နတ်ဆိုးတို့ကို အောင်နိုင်သော အခွင့်ရှိလာပေပြီ။

ယေရှုခရစ်တော် ရှင်ပြန်ထမြောက်ခြင်း သက်သေတန်ခိုး

(၃) ရက်မြောက်သောနေ့၌ ကဲသာဘုရင်၏ အခွင့်အာဏာဖြင့် ပိလတ်မင်းခတ်နှိပ်ထားသော တံဆိပ် ကျိုးပျက်၍ ဂူဝမှ ကျောက်တုံးကြီးကို ကောင်းကင်တမန် ဖယ်ရှား၍ ယေရှု၏ ခန္ဓာကိုယ်သည် ပုပ်ပျက်ခြင်း မရှိဘဲ၊ ဝိဉာဏကိုယ်ခန္ဓာအသစ်ဖြင့် ရှင်ပြန်ထမြောက်တော်မူခဲ့သည်။ ရက်ပေါင်း (၄၀) တမန်တော်များနှင့် တပည့်တော်တို့အား ကိုယ်ထင်ရှား ပြသ၍ ဝိညာဉ်အသွင်အားဖြင့် မိမိအသက်ရှင်ကြောင်း သက်သေဖြစ်စေခဲ့ပါသည်။

ကိုယ်တော် ရှင်ပြန်ထမြောက်တော်မူခြင်း၏ ဆုကျေးဇူးမင်္ဂလာများစွာ ရှိပါသည်။ လူသားအတွက် ယဇ်အဖြစ် ပူဇော်ခံခြင်းကို ထာဝရဘုရားအားရ ကျေနပ်လက်ခံကြောင်း သက်သေအဖြစ် ထမြောက်စေတော်မူ၏။ (ရောမ၊ ၄း၂၅၊ ဧဖက်၊ ၁း၂၀-၂၃)။ ကိုယ်တော် ခန္ဓာကိုယ် ရှိစဉ်၊ လာဇရုမှစ၍ သေသူတို့ အသက်ပြန်ရှင်စေသောအခါ ရုပ်ခန္ဓာသက်နှင့်ပဲ ပြန်ရှင်ခြင်းဖြစ်ပြီး၊ ကိုယ်တော်မူကား ဝိဉာဏကိုယ်ခန္ဓာဖြင့် ရှင်သော အဦးသီးသောအသီး ဖြစ်ပါသည်။ ထိုနည်းတူ ယုံကြည်သူတို့သည်လည်း မိမိတို့ အလှည့်ကျ ထမြောက်ကြရပေဦးမည်။ (၁ကော၊ ၁၅း၂၀-၂၃)

ရှင်ပြန်ထမြောက်တော်မူသောအရှင်ကို ကျွန်တော်ကျွန်မတို့လည်း အမှန်တကယ် ယုံကြည်လျက် ဝိညာဉ်၌ အတွင်းသက်သေရရှိပါလျှင် ကနဦး ယုံကြည်သောသူများကဲ့သို့ ဝမ်းမြောက်ရွှင်လန်းခြင်းနှင့် ကိုယ်တော် အသက်ရှင်ကြောင်းကို မဝေငှဘဲ သက်သေမခံဘဲ နေနိုင်မည် မဟုတ်ပါ။ ဘုရားရှင်ကို ချီးမွမ်းကိုးကွယ်ရခြင်း ဟာလည်း ငြီးငွေ့စရာ မဖြစ်တော့ဘဲ၊ အမြဲကျေနပ်အားရနေမည်ဖြစ်ပါသည်။

ကိုယ်တော်ကောင်းကင်သို့ တက်ကြွတော်မူ၍ ခမည်းတော်၏ လက်ျာဘက်၌ ထိုင်တော်မူလျက် (ဟေဗြဲ၊ ၁း၁-၃၊ ၄း၁၄-၁၆)

ကိုယ်တ်ာသည် ယနေ့ အလုံးစုံ၏ အချုပ်အခြာ၊ အသင်းတော်၏ ဦးခေါင်းအဖြစ် စိုးစံလျက် ရှိပါသည်။ ဤဖြစ်ရပ် အမှန်ဖြစ်ကြောင်း ဝိညာဉ်တော်ကို စေလွှတ်၍ အသင်းတော်ကို တစ်စုတဝေးတည်း ဖြစ်ဘွားစေ ၍ ဘိသိက်တန်ခိုးနှင့် ပြည့်ဝစေခြင်းသည် သခင်ယေရှုခရစ်တော်ဖြစ်ကြောင်း သက်သေထင်ရှားစေသည်။ စစ်မှန်သော ယုံကြည်သူခရစ်ယာန်တိုင်းအတွက်လည်း ပေတရုအဖို့ ဆုတောင်းပေးသကဲ့သို့ အဘ၏ လက်ျဘက်၌ အစဉ်ပဌနာပြုပေးလျက် ရှိပါသည်။ (ရောမ၊ ၈း၃၁-၃၄၊ ဟေဗြဲ၊ ၇း၂၅)

မကြာခင်ကြွလာ၍ သင်နှင့် ကျွန်ုပ်တို့ကို သိမ်းဆည်းမည်

"ယေရှုက သင်တို့စိတ်နှလုံးပူပန်ခြင်းမရှိစေနှင့်၊ ဘုရားသခင်ကို ယုံကြည်ကြလော့။ ငါ့ကိုလည်း ယုံကြည်ကြလော့။ ငါ့အဘ၏ အိမ်တော်၌ နေစရာအခန်းအများရှိ၏။ ... သင်တို့နေစရာအရပ်ကို ပြင်ဆင်ခြင်းငှာ ငါသွားရ၏။ ငါသည် သွား၍ သင်တို့နေစရာအရပ်ကို ပြင်ဆင်ပြီးမှ တဖန်လာပြန်၍ ငါရှိရာအရပ်၌ သင်တို့ရှိစေခြင်းငှာ သင်တို့ကို ငါ့ထံသို့ သိမ်းဆည်းမည်။" - (ယော၊ ၁၄း၁-၃)

ခမည်းတော်၊ သားတော်၊ သန့်ရှင်းတော်ဝိညာဉ်တော် သုံးပါး တစ်လုံးတစ်ဝတည်း ဖြစ်တော်မူသော ထာဝရအရှင်ဘုရားခင်၏ လူသားအတွက် အကြံအစည်တော်သည် အလွန်အံ့သြကောင်းမြတ်သည်သာ မက အားလုံးကွင်းဆက်၊ အချိတ်အဆက်မပြတ်ဘဲ၊ လိုလေသေးမရှိ၊ အားလုံးစီမံပြင်ဆင်ထားပြီး အာမခံချက် အပြည့်ရှိပါပေသည်။

ဘာသာ၊ သာသနာတွင် ဘုရားအတွက် ကြိုးစားလုပ်ဆောင်ရခြင်းထက် ဘုရားသခင်၏ ထာဝရနိုင်ငံတော် သားအဖြစ် ကိုယ်တော်နှင့်အတူ ကိုးစားလုပ်ဆောင်ရခြင်းသည် သာလွန်ကောင်းမြတ်သည် သာမက ထမ်းရသောဝန်သည်လည်း ကိုယ်တော်ပေးသော အလုပ်ဖြစ်၍ ပေါ့ပါးပြီး ထမ်းရန် လျှို့ဝှက်ချက်ကိုလည်း ကိုယ်တော်ထံမှ နည်းခံရ၍ ထမ်းရလွယ်ပြီး စိတ်ဝိညာဉ် ငြိမ်ဝပ်ချမ်းသာကို အမှန်ပင် ခံစားရမည် ဖြစ်ကြောင်း သက်သေခံလျက် ဝမ်းမြောက်ခြင်းနှင့် ဝေငှတိုက်တွန်းလိုက်ရပါသည်။