ရည်ရွယ်ထားသူ ပြန်လည်မေတ္တာသက်ဝင်လာအောင်...

အနှစ်နှစ် အလလ စောင့်စေားနေခဲ့ရသည့် သင်ချစ်ခင်စွဲလမ်းနှစ်သက်နေမိသော မိန်းကလေးထံမှ ချစ်မေတ္တာ တုံ့ပြန်မှုကို အမြန်ဆုံး ရရှိနိုင်မည့် နည်းလမ်းမျိုးကို ယောက်ျားလေးတိုင်း သိလိုကြမည် ဖြစ်ပါသည်။ သင့်ဆီသို့ မိန်းကလေးတိုင်း အခစား ရောက်လာစေမည့် မှော်ဝင်ပီယဆေးမျိုး ရှိမည် မဟုတ်သော်လည်း အောက်ပါ အချက်များအတိုင်း ကြိုးစားလုပ်ဆောင် ကြည့်ပါက ပြိုင်ဘက်များကို အောင်မြင်စွာ ဖြတ်ကျော်နိုင်မည် ဖြစ်ပြီး သင်မျှော်လင့်နေခဲ့ရသည့် အချစ်သရဖူကို ဆွတ်ခူးရယူနိုင်မည် ဖြစ်ပါသည်။

၁။ သူမအပေါ်ကို ဂရုစိုက် အရေးတယူပြုပါ။

သင်ချစ်သည့် မိန်းကလေး သင့်အပေါ် ပြန်လည်ချစ်ခင်သက်ဝင်လာစေမည့် အလွယ်ကူဆုံး နည်းလမ်း တစ်ခုမှာ သူမအပေါ် သင်မည်မျှ ဂရုစိုက်သည်ကို သူမအား သိရှိနားလည်နေတတ်ခြင်းပင် ဖြစ်ပါသည်။ သူမ၏ စကားအခွန်းတိုင်းကို စိတ်ဝင်တစားနားထောင်ပေးခြင်း၊ သူမ၏ အပြုအမူများကို အလိုလို သိရှိနားလည်နေတတ်ခြင်း၊ သူမ ကြိုက်နှစ်သက်သော အရာများ၊ အပြုအမူများနှင့် သူမ မကြိုက်နှစ်သက်သည် များကိုလည်း သိရှိကျွမ်းဝင်ထားရန် လိုအပ်ပါသည်။ သူမ၏ စိတ်ကို အလိုမကျ အနှောင့်အယှက်ဖြစ်စေတတ်သော ကိစ္စများကိုလည်း အသေးစိတ်မှတ်မိ သိရှိနေရန် လိုအပ်ပါသည်။

၂။ တရားလွန် ဂရုစိုက်ခြင်းမျိုး မပြုလုပ်သင့်ပါ။

သင်၏ အလေးထား ဂရုစိုက်ခြင်းမှာ သူမအတွက် နှစ်သက်ဖွယ်ကောင်းမည် ဖြစ်သော်လည်း အလွန်အမင်း ဂရုစိုက်လွန်းပါက သူမအတွက် မလူးသာ မလွန့်သာ နှင့် ကျဉ်းထဲကျပ်ထဲရောက်နေသကဲ့သို့ ခံစားရစေမည် ဖြစ်ပါသည်။ သင့်အနေနှင့်လည်း သူမအပေါ်ထားရှိသည့် ဂရုစိုက်မှုကြောင့် သူမအနေနှင့် မိုက်ခရိုစကုပ်အောက်တွင် နေရသည့် အရာဝတ္ထုတစ်ခု၏ ခံစားချက်မျိုး ရစေချင်မည် မဟုတ်ပါ။ သူမကို မျက်တောင် မခတ်ဘဲ စုးစိုက်ကြည့်တတ်သည့် အပြုအမူမျိုး၊ သူမနှင့် အပြင်လျှောက်လည်သည့်အခါမျိုးတွင် သူမ စိတ်ညစ်ညူးလာအောင် မေးခွန်းများ ဆက်တိုက်မေးခြင်းမျိုးကို မပြုလုပ်သင့်ပါ။ အလှမွေး ငါးကန် ဖန်ပေါင်းချောင်အတွင်းတွင် နေရသည့် ခံစားမှုမျိုးကို မည်သည့် မိန်းကလေးမှ နှစ်သက်မည် မဟုတ်ပါ။ နှစ်ဦးနှစ်ဘက်အတွက် အဆင်ပြေမည့် အနေအထားမျိုး ဖန်တီးခြင်းဖြင့် ပျော်ရွှင်ဖွယ်ရာ အချိန်များကို ဖန်တီးနိုင်ပါသည်။

၃။ သူမကြည်နူးပျော်ရွှင်စေရန်အတွက် တစ်စုံတစ်ခုကို ပြုလုပ်ပေးရန် ရက်ရွေးမနေသင့်ပါ။

ထို့အပြင် သင်ချစ်သောသူမကို အားလပ်ရက်၊ ရုံးပိတ်ရက်မျိုးမှ သတိရခြင်းမဟုတ်ဘဲ၊ အချိန်တိုင်း သတိတရနှင့် သူမအကြောင်းကို တွေးတောနေတတ်ကြောင်း သူမ သိပါစေ။ သင်ဝယ်ယူပေးနိုင်သော အနေအထားတွင် ရှိသည့် ချစ်စဖွယ် လည်ဆွဲလေးများ၊ နားကပ်လေးများကိုတွေ့ပါက သူမကြိုက်နှစ်သက်မည် ထင်လျှင် ဝယ်ယူထားလိုက်ပါ။ သူမ ရုံးသို့ရောက်သည့်အချိန်တွင် မွှေးကြိုင် လတ်ဆတ်သော ပန်းစည်းတစ်စည်းက အသင့်စောင့်ဆိုင်းနေခြင်း (သို့မဟုတ်) အထူးတလည် အကြောင်းရင်း မရှိဘဲ စိတ်ကူးယဉ်ဆန်ဆန်၊ ရင်ခုန်ကြည်နူးဖွယ်ရာ ဖန်တီးထားသော ညစာကို သူမနှင့်အတူ သုံးဆောင်ခြင်းစသည်ဖြင့် စီစဉ်နိုင်ပါသည်။ သူမသည် သင့်အတွက် နံပါတ်တစ် အထူး အရေးပါသူ တစ်ယောက်ဖြစ်ကြောင်းကို ခံစားမိစေမည့် အကြောင်းရင်းများကို ဖန်တီးပေးရန် အတွက်  ရုံးပိတ်ရက်မျိုးကို စောင့်ရန် မလိုအပ်ကြောင်းကိုလည်း အမှတ်ရစေလိုပါသည်။

၎။ သင့်မိန်းကလေးသူငယ်ချင်းမှ အလေးထားသော သူမ၏ မိတ်ဆွေ သူငယ်ချင်း၊ အပေါင်းအသင်းများနှင့် ရေရှည်ဆက်ဆံရေးတွင် အဆင်ပြေစေရန် သင့်အနေနှင့် အားထုတ် လုပ်ဆောင်ရမည် ဖြစ်ပါသည်။ 

သူမ ချစ်ခင်အလေးထားသောသူများထံမှ အမှတ်ကောင်းကောင်း မရပါက သင့်အနေနှင့် သူမ၏ အချစ်ကို ရရှိဖို့အတွက် အတော်ပင် ကြိုးစားရဦးမည့် အခြေအနေဖြစ်ပါမည်။ သူမ၏ မိဘများအပေါ်တွင် ရိုသေလေးစားစွာ ဆက်ဆံပါ။ သူမတွင် မောင်နှမသားချင်းများ ရှိပါက ၎င်းတို့နှင့် ရင်းနှီး ကျွမ်းဝင်လာစေရန် သင်ကြိုးပမ်းပါ။ သူမ၏ အရင်းနှီးဆုံးသူငယ်ချင်းများကိုလည်း သင်၏ သူငယ်ချင်းများ ဖြစ်လာအောင် ပြုလုပ်ပါ။ တစ်နည်းအားဖြင့် နောင်အနာဂတ်တွင် သူမ၏ မိသားစုနှင့် မိတ်ဆွေသူငယ်ချင်းများက အခြေအနေတစ်ခုအရ သင့်ဖက်တွင် ရပ်တည်ပေးလာမည် ဖြစ်ပါသည်။

၅။ သူမအပေါ် တန်ဖိုးထားလေးစားမှု ရှိရမည် ဖြစ်ပါသည်။

သင်သည် မျက်နှာများသူတစ်ယောက် ဖြစ်ကြောင်းကို သူမ သိရှိပါက သင့်အပေါ်တွင် ချစ်တုံ့ပြန်မည်ဟု သင်ထင်ပါသလား။ သူမအပေါ် လိမ်ညာလှည့်ဖြားမိခြင်း၏ ရလာဒ်မှာ မချစ်နိုင်ပါ ဟူသော အဖြေသာ ဖြစ်ပါလိမ့်မည်။ သူမ၏ မကောင်းကြောင်းကို သင့်သူငယ်ချင်းများမှ ပြောဆိုလာသည့်အခါ သူမဘက်မှ ကာကွယ်ပေးပါ။ သူမ၏ ဂုဏ်သိက္ခာ ကျဆင်းစေမည့်စကားမျိုးကို သင်ကိုယ်တိုင် မပြောမိပါစေနှင့်။ နှမသားချင်း ကိုယ်ချင်းစာနာ၍ သင်ချစ်သော မိန်းကလေးအပေါ် အရိုးသားဆုံးနှင့် အကောင်းဆုံး ပြောဆိုဆက်ဆံပါ။ မိမိအပေါ် တန်ဖိုးထားလေးစားမှု မရှိသည့် ယောက်ျားလေးများကို မည်သည့် မိန်းကလေးကမှ ချစ်ခင်လေးစား သံယောဇဉ် မထားသင့်ကြောင်း သိရှိထားရန် လိုပါသည်။

Credit: WOW Living Tips